Weekendje weg met de camper De Heilige Paters van Luuëke ginge un weekendje weg met de camper. Nao völ lol en plezeer ging ut alweer op hoeës aan. Ut es un hieël ritje van zieë uut nao hoeës dus onger weegs most d’r ouch effe un plaspauze ingelastj waere. Effe stoppe Um det de noeëd hoeëg es en dur nog gein tankstation inne buurt es dan mer effe langs de ieërste de beste parkierplaats effe stoppe. De mieëste moste toch echt hieël noeëdig plasse. Rick waas nog lekker aan ’t slaope boëve inne camper. Tenminste det dachte ze, want weej det de rest trök kwaome beej de camper woeëre ze weer opgeluchtj en koste ze weer wieëter rei-je. Mer laotj now net Rick ouch hieël noeëdig nao de wc motte weej dette wakker waas gewoeëre en hae waas gaw effe nao boete gegliptj um te plasse. "Nondedju dao kloeëte ze mich!" dinkj hae. "Now rei-je ze aan um mich te jenne". Dan mer zwei-je en roôpe, mer nein, niks gein reactie. Dan mer un versnelling haarder renne… en ... dao gieët dan de camper opppe invoegstrook de snelweeg op. Effe belle "Ut zal toch neet waor zeen... meine tellefoon ligtj nog inne camper", dinktj hae. Dan mer aan un paar minse vraoge of det hae moog belle mer helaas kintj hae de GSM nummers van zieën vreêndje neet uut de kop... Dan mam mer effe belle. Dao gieët de tillefoon inne camper: "Ja, met Kevin?"... Det es de man van Rick, waat mot deej now??? "Volgens mich zeejjae eêmus vergaete oppe parkieërplaats!", zeet de moôder van Rick. - "Nein huuër, vae zeen complieët!" "Dan kiektj mer us tegooj…!" - "Miljaar, woeë es Rick???" "Tjeh, dae most ouch effe plasse..." Dan mer d’n ieërste en de beste aafslaag d’r aaf en trök. "Hmmm...", zeêt Joeri, "Mer beej welke parkieërplaats zeen vae ouch weer gestoptj?" "Ich weit allein det d’r unne blauwe vrachtwaage stong", zeet Pascal... En laotj dae now net zeen weggereejje!!! Dus dan mer op good gelök gestoptj en jaowaal... dao zaat Rick te wachtte oppe stoep. Zonger tillefoon mer waal klaorwakker!!!
16 Online Touch Home