Sa kin it ek! It paad lâns de tunen by it spoar wie ferriden troch in frachtauto dy’t de hekkelseaden ophelle by it gemaal. No is it troch in warbere doarpsgenoat wer ynoarder, ferbrede en skjinmakke. Op ien fan myn deistige rûntsjes mei myn hûntsje seach ik ús doarpsgenoat en havenmeester Marco Dusselaar skreppen, op eigen inisjatyf, om it ferriden paad by it transformator/seinhúske fan Prorail wer begeanber te meitsjen. Troch min ûnderhâld fan de oanlizzers (Wetterskip en Prorail) wie troch de jierren hinne it njonkenlizzende paad slim oerwoekere troch de toarnbeien. Hjirtroch waard dit paad smeller. Nei it opheljen fan de seaden dy’t út de feart weihekkele wienen, koe men der mar min mei skjinne fuotten lânskomme. It paad wurdt in protte brûkt om in rûntsje te kuierjen. Marco hat it wer skjinmakke en de toarnbeien oardel meter ynsnoeid sadat we der wer kreas lâns rinne kinne! Ut namme fan al ús deistige kuierders, bedankt Marco! Rinze de Groot Ôfskie Sa giet soks: in gedachte, in blik op Funda en Oostersingel 66 C yn Ljouwert wurdt ús nije wenstee. In frjemde tiid wie it: de ferkeap fan it hûs wer’t wy sûnt healwei juny 2000 ús ta wenjen set hiene (de Skuorrereed 24), de buorlju, goekunde, it skutten yn de Wjukken, de Wjukken sels, it kuierjen yn en om Mantgum, de praatsjes op strjitte en by de Poiesz, gean samar troch. En gelokkich wie der ek de Omrin, de Estafette en Mantgum Fergees op facebook en Whatsapp! En dochs in oar paad. Foar ús hat it wenjen hjir yn Ljouwert sa syn foardielen: gjin tún, en de soarch derfoar, mear. In lytser hûs en werom nei ús beider bertestêd (sa’n hûndert meter fierder stiet it bertehûs fan Yvonne oan de Oostergrachtswal!). No in oare en nije tiid. Yn it wenjen hjirre yn Ljouwert leit in nije útdaging op ús te wachtsjen. En it fielt goed. Tsjin alle Mantgumers sizze wy: “Dat it jimme ek goed gean sil!” Yvonne en Sjouke Dijkstra-Feenstra Mandeguod maart 2025 | 9
10 Online Touch Home