Tusken Tsjerke en Kroech 2024 Op sneon 1 juny hawwe wy wer ús wenstige TTeK-tocht holden, it waar wie wikselfallich, mar by de start, mei it Weidumer Korps op it grien fan ’e famylje Wiersma, wie it gelokkich drûch. As bestjoer sjogge wy werom op in slagge tocht, mei rom ferskaat oan aktiviteiten; it sprekt foar himsels dat wy it net elkenien hielendal nei it sin meitsje kinne, mar te oardieljen nei de lûden achterôf foel it programma by de measten wol yn ’e smaak. Lykwols, as bestjoer rinne wy wol tsjin ús grinzen oan. It tal belangstellenden skommelet de lêste jierren sa tusken de 100 en 140 minsken, op himsels in moai oantal, mar foar in doarp mei mear as 1100 ynwenners fine wy it dochs wol wat oan ’e meagere kant, benammen as men sjocht hoefolle tiid der yn stutsen is om it program rinne te litten sa as it rint. Ek hawwe wy murken dat in protte Mantgumers it hiele barren net iens kenne, ek al wenje se hjir soms mear as tsien jier. → Mandeguod juli/augustus 2024 | 25
26 Online Touch Home